Plataforma en Defensa da Sanidade Pública

Os Sindicatos CC.OO., C.I.G. e U.G.T. diríxense a vostedes para denunciar publicamente, de novo, os recortes que vai facer a Consellería de Sanidade no sector das ambulancias.
Entre outras cousas pretende facer o seguinte:

• Deixar as ambulancias medicalizadas sen técnico-axudante. Antes a dotación era de catro persoas e agora serán tres.
• Deixar as ambulancias de nova creación (sanitarizadas e 4x4) sen técnico-axudante.
• Suprimir bases do 061 ou suprimir o turno de noite.
• Facer servicios sanitarios (dialise, por exemplo) nos autobuses do 065, que non están acondicionados nin o persoal formado para esa laboura.
• Facer desaparecer a obriga de pago da ambulancia por parte do Sergas.
• Diminuir os servizos das ambulancias, desaparecendo o transporte sanitario universal. Asumiriamos as disposicións de contidos mínimos da lexislación estatal, renunciando as melloras existentes en Galicia, convertíndonos na Autonomía máis precaria en transporte sanitario.

Poderemos chamar á ambulancia e que non veña ou que veña e despois nos pasen a factura.
Os tres Sindicatos pedimos en varias ocasións (dende hai mais dun ano) ser recibidos pola Consellería para que nos explique todo isto, sen que nos contestara. Non sabemos se é que non sabe para donde quere ir ou se é que o sabe perfectamente, pero quere ocultalo ata despois das eleccións.
As medidas que pretende por en marcha a Consellería supoñen unha diminución dos servicios sanitarios á cidadanía e un recorte de persoal de aproximadamente un terzo.
As asembleas de traballadores realizadas deron a sua aprobación ao calendario proposto polos Sindicatos e que significará que, despois do traballo informativo entre a cidadanía e outras movilizacións, o sector estará disposto a chegar a unha folga.