Plataforma en Defensa da Sanidade Pública

Dende fai moitos anos a Área sanitaria de Vigo, foi escenario da posta en funcionamento de diversas experiencias de privatización, de servizos sanitarios e de penetración empresarial privada nos servizos públicos.  Trátase de unha política favorecida polas minguantes inversións en dotacións de Atención Primaria e notablemente pola falta da adecuación dos hospitais, configurando así unha intolerable discriminación da nosa cidadanía no acceso a unha atención sanitaria de calidade, similar a que teñen outras áreas sanitarias.

O proxecto que lidera Feijoo promove un hospital de propiedade privada, mantén a fragmentación da área, complica a súa xestión ao dividir o hospital parte pública e privada, reduce o número de camas e a dimensión do edificio, elimina o módulo de investigación e docencia, mantén a dobre porta de urxencias, incrementa a separación entre centros e niveis asistenciais e mantén a Povisa como Hospital, cun sector de poboación, mediante un contrato de xestión de servizos de Atención Especializada de tipo capitativo.
Ademais de todo iso, hipoteca gravemente o futuro da Sanidade Pública galega abrindo de maneira irreversible  as portas a futuras formas de privatizala.
Animamos a cidadanía da comarca, aos concellos, institucións representativas e a todas as asociacións de todo tipo a esixir que se manteña  o modelo de financiamento e xestión públicos do Novo Hospital de Vigo, sen recortes no Plan Funcional previamente deseñado nin no dimensionamento do edificio.