Plataforma en Defensa da Sanidade Pública

En relación coa pregunta con resposta escrita núm.: 53152, formulada polo Grupo Parlamentario do Bloque Nacionalista Galego, a iniciativa de dona Ana Luisa Bouza Santiago e don Bieito Lobeira Domínguez, sobre "a discriminación que padece a poboación do Morrazo na súa asistencia sanitaria e as medidas que se van adoptar para evitala", (publicada no BOPG núm.: 350, do 9 de novembro de 2010), teño a honra de enviarlle, para así dar cumprimento ao previsto no artigo 157 do Regulamento do Parlamento de Galicia, a contestación formulada pola Consellería de Sanidade, que ten o seguinte contido:
"A información solicitada, está recollida na web do Sergas, ao igual que a dos hospitais do sistema sanitario público de Galicia.
O Hospital Povisa é un centro asistencial de titularidade privada, situado na cidade de Vigo, e debidamente acreditado, como esixe a normativa vixente, para a concertación da prestación da asistencia sanitaria.
A súa vinculación coa asistencia sanitaria pública está maioritariamente regulada por concertos sucesivos iniciados o 24 de marzo de 1993. 0 actual concerto entre o Servizo Galego de Saúde e Povisa foi asinado en data 29 de decembro do ano 2000. Neste concerto establécense os criterios da actividade asistencial e os obxectivos de calidade asistencial.
Estamos a traballar nas bases que rexerán o novo concerto co Hospital Povisa. Un dos principais criterios neste novo concerto é a libre elección de centro para a poboación que neste momento ten como referencia o hospital Povisa."
O que lle remito para o seu coñecemento e inserción no Boletín Oficial do Parlamento de Galicia, de acordo co previsto no artigo 65 e concordantes do Regulamento vixente.