Plataforma en Defensa da Sanidade Pública

No mes do Dia Internacional da Saúde, Médicos do Mundo-Galicia organiza en Compostela actividades de sensibilización en torno ao dereito á saúde.


Neste mes de abril comemórase o Día Internacional da Saúde, que cada ano presta atención a cuestións relevantes de saúde pública no ámbito internacional. Paralelamente, no Estado Español cúmprense dous anos da entrada en vigor do Real Decreto 16/2012, de medidas urxentes para garantir a sustentabilidade do Sistema Nacional de Saúde e mellorar a calidade e seguridade das súas prestacións, que entre outras medidas deixou fóra do sistema sanitario as persoas inmigrantes en situación irregular, o que supón unha ruptura co modelo vixente até o momento, que pretendia garantir o dereito de sanidade universal.
Médicos do Mundo considera que o Goberno español debe pór en marcha de maneira prioritaria as medidas lexislativas, políticas e orzamentarias necesarias para restituír o modelo sanitario acorde co principio de Universalidade da asistencia sanitaria.
É por isto que dende Médicos do Mundo-Galicia escollemos este mes de abril para facer visíbeis as consecuencias da entrada en vigor deste decreto e sensibilizar á cidadanía en torno ao dereito á saúde para todas as persoas. Así, no vindeiro día 22 de abril realizaremos en Santiago de Compostela as seguintes actividades:

 Xogo de rol: A SAÚDE NON É UN XOGO
12:00-15:00 h. Na Praza do Toural (Santiago de Compostela)

Pasarrúas con percusión: A CONGA DA SAÚDE
Saída ás 17:00h da Praza do Toural, acompañadas polo grupo Trópico de Grelos.

Para máis información:
Iria Gippini. Tel. 639.647.153
iria.gippini@medicosdelmundo.org

INFORME COMPLETO "Dos años de reforma sanitaria, más vidas humanas en riesgo"
EN: http://issuu.com/medicosdelmundespana/docs/impacto-reforma-sanitaria-medicos-d

"A reforma sanitaria pode custar vidas". Deste rotundo xeito explican cinco organizacións non gobernamentais de ámbito galego e internacional os seus temores a respecto do recorte nos servizos de saúde que trae consigo o Real Decreto-lei 16/2012, a norma do Ministerio de Sanidade que ten como máximo expoñente a reforma do copagamento de medicamentos pero que trae consigo unha onda expansiva que pode ser, se cadra, aínda máis grave que o impacto económico nos petos da poboación con menos ingresos, como as persoas xubiladas. Amnistía Internacional, Médicos do Mundo, o Foro da Inmigración, SOS Sanidade Pública e Rede Acolle achegáronse este martes á sede da Xunta para, como no resto das autonomías, rexistrar ante a Presidencia do Goberno galego as 59.146 sinaturas que xuntaron como símbolo dunha esixencia: que as administracións públicas "garantan o acceso ao dereito á saúde a todas as persoas, sen regresividade nin discriminacións" o que tamén, subliñan, inclúe ás persoas inmigrantes.
Publicado en Praza Pública

Médicos do Mundo e SOS Sanidade Pública denunciamos que a Xunta de Galicia rompe os principios de Universalidade e Equidade da Sanidade Pública, deixando ás persoas con menos recursos sen dereito á asistencia sanitaria.
A Orde de 5 de setembro de 2011, actualiza o procedemento para o recoñecemento do dereito á asistencia sanitaria por parte das persoas sen recursos económicos suficientes (PSR), das persoas que se atopan en situación de desemprego (Código 29), e das persoas estranxeiras.