Plataforma en Defensa da Sanidade Pública

O martes 24 de febreiro a Plataforma en Defensa da Sanidade Pública de Cangas mantivo unha xuntanza para analizar e organizar a mobilización do próximo xoves 19 de marzo en contra dos recortes na Sanidade e da política privatizadora que os gobernos da Xunta e de Madrid están aplicando para destruir o actual sistema sanitario e sustituílo por outro modelo que ofrece menor calidade e rompe o dereito de gratuidade e universalidade.

Acadamos realizar no noso Concello unha concentración e manifestación o mesmo día da mobilización en toda Galicia, posto que, ademáis das reivindicacións xenéricas da nosa comunidade, creemos que a loita que levan realizando os colectivos de O Hío dende hai anos en defensa do prometido Centro de Saúde -no que o Concello xa investiu unha cifra de 400.000€- merece que se visualice como un acto de protesta social en contra do acordo tomado polo goberno local do PP de rehabilitar a antiga Casa da Unión, o cal está moi lonxe de solucionar o problema sanitario que padece esta parroquia.

Polo tanto, temos convocado para o próximo mércores 4 de marzo as sete da tarde na Casa da Cultura de Cangas a todos os Partidos, Sindicatos e asociacións veciñais de Cangas para artellar xuntos o traballo de cara a esta mobilización do día 19. E tamén conectar cos colectivos afectados de hepatite C e ELA.

Cangas, 02 de marzo de 2015