Plataforma en Defensa da Sanidade Pública

A lista de espera cirúrxica en POVISA volve superar os 200 días de demora media por segunda vez desde que Feijoo chegou á Presidencia da Xunta en 2009. O que ocorreu este último trimestre (o 3º de 2013) tal vez fose algo esperable tras o conflito laboral recente cunha folga que se prologou varias semanas neste verán. Os usuarios e usuarias obrigatoriamente adscritos a este hospital concertado somos os que pagamos as consecuencias da tolerancia da administración coa irresponsabilidade dos xestores privados. A "política de non intervención" na que se escudou a Consellería demostrou unha vez máis que para os responsables do Sergas os e as pacientes somos un elemento secundario. O máis importante, por suposto, é a empresa da que con anterioridade formou parte a Sra. Mosquera.
Son uns números, por outra banda, escandalosos cando aínda o mes pasado a Conselleira sorprendía a todo o mundo no Parlamento de Galicia sacando a luz os resultados dunha consultoría fantasma que concluía que tras a última redución de persoal o hospital funcionaba mellor. De novo a recurrente sonatina neoliberal de "facer máis con menos". Pois velaí están os resultados da salvaxe política de persoal que nos colle de cheo aos sufridores e pacientes de POVISA.
Fracaso tras fracaso, e pechándose en banda a calquer explicación ou diálogo cos afectados e os traballadores do centro hospitalario, moito nos tememos que a estas alturas a única alternativa que queda é pedir a DIMISIÓN da Conselleira e de todo o equipo de incompetentes que a rodea.