Plataforma en Defensa da Sanidade Pública

Cando aínda non nos tiñamos recuperado do anunciado recorte dos 65.000 millóns (ver aquí) para próximo bienio, este venres negro (outro para a serie) o goberno incrementa esa cantidade en 37.000 millóns de euros máis. Destes uns 15.000 millóns de "aforro" serálle adxudicado a sanidade e ensino. Para a sanidade suporá, polo menos, senllos recortes en cada un dos próximos dous anos similares aos de 2.012, que acadaron a cifra de 7.000 millóns de euros. Na administración traerá centos de miles empregados públicos despedidos. Só en Galicia, en educación secundaria, a CIG ten denunciado que para o próximo curso contaráse con 1.000 profesores menos. Empregados municipais, médicos, enfermeiras,... correrán a mesma sorte.
Seguimos a folla de ruta marcada polos grandes poderes financieiros. Agora tócalles aos desempregados (para mediados de mes os de longa duración deixarán de percibir o mísero subsidio de 400 euros) e de seguido aos xubilados. Por que o sabemos? Moi sinxelo, porque o Presidente do goberno, o Sr. Rajoy, ven de xurar e perxurar que non lles tocará nas pensións. Esta é a regla de ouro deste goberno: facer todo o contrario ao que se comprometeu nas eleccións. É, polo tanto, un goberno contrario á lexitimidade conseguida nas urnas mediante o voto da cidadanía. Semella que xa non é hora de pedir que retiren as medidas ou cambien de políticas senon de obrigalos a que se vaian canto antes.