Plataforma en Defensa da Sanidade Pública

Non resultan inesperados os datos que vén de ofrecer o SERGAS sobre as listas de espera de POVISA correspondentes ao segundo trimestre do ano en curso, malia á tirapuxa mantida meses atrás con Feijoo e a Consellería que, por suposto, non conseguiron meter en cintura a este hospital privado que campa ás súas anchas a base de máis de 130.000 pacientes cautiv@s que somos as súas víctimas e fonte de negocio.
Para este trimestre aumenta a diferencia co resto dos hospitais galegos en case 65 días máis de espera media para cirurxía, chegando aos niveis máximos desde que este cómputo se ten feito público.
Está claro que ningún goberno logrará parar este cabalo desbocado se non se posiciona con auténtica contundencia en favor do dereito dos veciños e veciñas do Morrazo asignados obrigatoriamente a POVISA a ter unha asistencia hospitalaria pública como o resto da cidadanía.
Á marxe de xestos de cara a galería, a reducción non só de máis de 350 camas no proxectado Novo Hospial de Vigo senon en todos os servizos incluídos no mesmo, tal como se ven anunciando últimamente desde determinados medios, reforza aínda máis a posición de POVISA na área sanitaria, evidenciando a aposta da Xunta polo reforzo da privatización do sistema hospitalario na área sanitaria de Vigo que, a fin de contas, trae estes resultados.
Xa o temos dito en reiteradas ocasións: en tanto non se retome o camiño emprendido co acordo de 2.006 para concederlle a POVISA un estatus de centro limitado á atención de determinadas patoloxías e complementario da oferta hospitalaria na área sanitaria, continuará a chantaxe ao SERGAS, a sangría das arcas públicas e o secuestro duns pacientes convertidos en verdadeiros reféns desta máquina de facer cartos a conta da nosa saúde e da nosa paciencia.