Plataforma en Defensa da Sanidade Pública

Os veciños e veciñas de Cangas somos pacientes por partida triple. Somos pacientes cando estamos enfermos e precisamos dos servizos hospitalarios, somos pacientes porque temos moita paciencia e somos pacientes porque padecemos desde décadas a POVI$A. Somos pacientes con P maíusculo de POVI$A.
Nós si sabemos o que é a sanidade privada e sentímolo moito, pero a mensaxe que vos traemos da nosa experiencia desde o Morrazo non é moi reconfortante. “Disfrutamos”, dito sexa con toda a ironía, das listas de espera cirúrxicas máis grandes de todos os hospitais de Galicia e de “regalo” non temos acceso a servizos como a hospitalización a domicilio ou os coidados paliativos como o resto dos usuarios e usuarias da nosa mesma área sanitaria. Padecemos un “apartheid” hospitalario desde hai décadas.

A PDSPC está aquí porque queremos que o Hospital Novo de Vigo sexa 100% público e deixemos de estar encadeados a POVI$A. Fixádevos este hospital privado ten 400 camas hospitalarias. Non é por casualidade que sexa case o mesmo número das que lle quitou o goberno de Feijoo ao proxecto do Novo Hospital de Vigo. As complicidades están claras: a actual Xerente do SERGAS foi anteriormente xerente dun hospital privado de Santiago do mesmo grupo empresarial que POVI$A.
POVI$A utiliza aos traballadores ameazándoos con botalos a rúa para defender os seus intereses capitalistas, mantennos aos usuarios e as usuarias como reféns da súa carteira de negocio e chantaxea constantemente ao SERGAS. Cando lle convén engorda as listas de espera; provoca a alarma social para que o goberno de turno lle encha o papo: máis de dous millóns de euros conseguiu en 2008 utilizando esta artimaña. E así con todo.
Si, nós sabemos o que lle espera á Sanidade Pública de Galicia se a deixamos en mans destes negociantes da saúde. En POVI$A funciona así: unha “clase turista” para os afiliados do SERGAS con cuartos de dúas e tres camas e “suites hoteleiras” de primeira clase para os que teñen a sorte de contar cun seguro privado.
Vimos de Cangas. Alí ao pé do monte do Facho, na parroquia de O Hío os veciños e veciñas descendentes daqueles habitantes do castro resisten e loitan por un centro de saúde. Tedes que sabelo. O goberno da Xunta consignou 50.000 € nos orzamentos de 2011 para o Centro de Saúde, mentres o Concello xa gastou 400.000 €, 8 veces máis, en mercar os terreos e, a última hora, aínda houbo que superar toda unha serie de atrancos, sen contar con nengunha axuda nin colaboración senon todo o contrario por parte da administración autonómica; a que ten as competencias fundamentais para a prestación dos servizos de saúde a toda a poboación. Pero, malia todo, resistimos e, só xuntos teremos unha oportunidade de cambiar o rumbo destas cousas.

CONTRA A PRIVATIZACIÓN DA SANIDADE PÚBLICA!!
VIVAN AS PLATAFORMAS EN DEFENSA DA SANIDADE PÚBLICA!!