Plataforma en Defensa da Sanidade Pública

Ante a información da marcha atrás da Consellería de Sanidade na súa decisión de que a poboación de Bueu e Marín fora atendida no hospital privado POVISA, a Asociación Galega para a Defensa da Sanidade Pública quere comunicar que:

1. Consideramos esta decisión como unha derrota parcial nos proxectos de privatización da sanidade pública da Xunta de Galicia.
2. Atribuímos a mesma ao forte movemento de rexeitamento das Plataformas para a Defensa da Sanidade Pública de toda as localidades afectadas (Pontevedra, Vigo, Moaña, Cangas, Bueu e Marín) así como das numerosas organizacións sociais, sindicais e políticas que anunciaron mobilizacións en contra da medida.
3. Pese a esta marcha atrás advertimos que a Xunta de Galicia non renuncia a seguir desenvolvendo a súa política de:

• Privatización da sanidade pública para favorecer a empresas afines,  ás que non son alleas as portas xiratorias (os mesmos personaxes entran e saen continuamente das empresas e da administración sanitaria).
• Desmantelamento das áreas sanitarias para crear un gran espazo de mercado onde os centros privados poidan captar a súa clientela en toda Galicia (pagado con diñeiro público).

Como exemplos desta estratexia estarían o recorte do proxecto do Novo Hospital de Vigo para manter o Concerto Singular con POVISA (agora renovado), a paralización do Hospital Único de Pontevedra, ou a modificación do Mapa Sanitario para que a poboación de Pontevedra Norte sexa atendida no Hospital de Santiago, por servizos pendentes de privatización grazas ás Unidades de Xestión Clínica.
Por todo isto facemos un chamamento a todas as forzas sociais e profesionais a estar atentas a novos intentos privatizadores da sanidade polo Goberno da Xunta e Esiximos a dimisión da Consellería de Sanidade e a rectificación pública e reversión das políticas privatizadoras  do Presidente Sr. Nuñez Feijoo.