Plataforma en Defensa da Sanidade Pública

Ante as noticias de que a Xunta de Galicia elaborou un protocolo remitido ás empresas de ambulancias que se ocupan do transporte sanitario urxente para o traslado dos feridos menos graves de accidentes de tráfico a clínicas privadas, mentres que os maior gravidade o fagan aos hospitais públicos, a Asociación Galega para a Defensa da Sanidade Pública quere comunicar que esta medida supón:

1. Un paso máis na privatización da asistencia sanitaria, ao obrigar ás ambulancias (servizos tamén privatizados) a trasladar pacientes a centros privados. Isto xa se vén facendo desde fai algún tempo desde os servizos de información sanitarias (tamén privatizados) nos que se anima a pacientes pendentes de intervención cirúrxica a acudir a centros privados concertados.
2. Unha descapitalización do sistema alentada pola propia administración sanitaria pública que selecciona aos enfermos menos custosos para os centros privados e quédase cos máis graves cuxo tratamentos son máis elevados.
3. Esta estratexia supón un apoio descarado ao sector privado para que se lucre con fondos públicos, que ten a súa explicación polos conflitos de intereses dos dirixentes políticos, que saen e entran da administración desde o sector privado (porta xiratoria). Non hai que esquecer que a mesma Conselleira era xerente dun centro privado do grupo POVISA, cando foi nomeada para o seu cargo de responsabilidade pública.
4. Desde a AGDSP esiximos a retirada desta medida de apoio económico ao sector privado, mentres se recortan dereitos a pensionistas, doentes crónicos, discapacidade ou con graves enfermidades como o cancro que deben pagar pare dos tratamentos fornecidos nos hospitais.