Plataforma en Defensa da Sanidade Pública

Tras a información publicada recentemente nos medios de comunicación, a respecto das conclusións dun "estudo interno" que pretende avaliar a alta satisfacción dos usuarios da Área Sanitaria de Povisa, de forma que volverían elixir ese centro sanitario privado de existir libre elección, mesmo a pesar de estar afectados por unha lista de espera que triplica a media dos hospitais de Galicia, a AGDSP quere comunicar:

1. Non dispoñemos de datos que avalen a calidade do estudo de satisfacción, pero chama a atención que unicamente se considerasen válidas o 29% das enquisas realizadas (400 de 1380) polo que a súa metodoloxía parece máis que dubidosa.
2. A devandita empresa, Contactnova-Callcenter, pertence a unha sociedade de capital risco, Netaccede S.C.R e a Novagalicia Banco.
3. O representante da sociedade, Netaccede é o ex directivo de Deloitte, Marcelino Otero López, á súa vez presidente do Círculo de Empresarios de Galicia-Club Financeiro Vigo, onde comparte mesa co propietario do Hospital Povisa, José Bernardo Silveira, Gregorio Gorriarán (Caixanova) e Jaime del Olmo (Deloitte).
4. Contactnova-Callcenter é a empresa á que a Xunta de Galicia adxudicou o "Servizo de atención e información á poboación "012" polo que o seu propietario, o fondo de investimento Netaccede, dispón de toda a información relevante da poboación galega, incluíndo os datos fiscais, laborais, sanitarios, afectivo-sexuais (servizo "quérote") ou de violencia de xénero.

Povisa intenta avaliar a calidade da súa atención sanitaria nuns momentos nos que o seu futuro está en cuestión, pola situación económica, os seus malos indicadores e a construción do Novo Hospital de Vigo, pero os medios utilizados son tan groseiros que insultan á intelixencia do pobo galego.
Dende a AGDSP cuestionamos a validez do estudo de satisfacción do centro sanitario, tanto pola súa calidade metodolóxica coma polos fortes intereses cruzados existentes, ademais de manifestar a nosa preocupación pola desprotección dos datos máis sensibles da poboación galega, que remataron en mans dun fondo de capital risco.