Plataforma en Defensa da Sanidade Pública

Ante a resposta da Xunta nalgúns medios de comunicación á rolda de prensa realizada onte pola Asociacion para a Defensa da Sanidade Pública de Vigo, queremos facer as seguintes precisións :

1. Iniciouse a obra sen proxecto definitivo de execución aprobado polo SERGAS, a empresa concesionaria declara e reclama sobrecustos de 8 millóns de euros na pilotaxe da obra, negóciase cos servizos do Hospital unha redución do proxecto orixinal para manter o equilibrio económico-financeiro da concesión que contempla sobrecustos e beneficios elevadísimos, paralízase a obra pola incapacidade da empresa concesionaria para financiar o proxecto.
2. A obra está paralizada pola incapacidade da empresa concesionaria para financiar o proxecto, debendo ser a propia Xunta a que actúe como promotor e avalista dun crédito ante o Banco Europeo de Investimentos de ata 180 millóns de euros, condicionado a que a empresa obteña o resto do financiamento cun grupo de bancos entre os que está Novagalicia banco ( será co diñeiro das preferentes ou co do rescate do FROB? ) e o Instituto de Crédito Oficial ( (ICO ), e a que se cumpran os condicionamentos do propio BEI e a normativa comunitaria. O crédito está aprobado pero non asinado desde fai máis dun ano, negóciase pero non se formaliza.
3. Ratifícase a paralización do proxecto por falta de financiamento, consecuencia do modelo elixido polo goberno da Xunta para privatizar o Novo Hospital de Vigo.
4. A pesar de que o contrato é a risco e ventura da concesionaria podería darse o caso de que o proxecto financiásese fundamentalmente pola intermediación da Xunta a través do BEI e do Instituto de Crédito Oficial.
5. Estanse producindo alteracións substanciais no financiamento e nas hipóteses básicas do contrato, xa que é a Xunta a que debe garantir a viabilidade económico financeira do proxecto ante a incapacidade da empresa concesionaria, o que fai xa necesario cambiar o modelo actual de financiamento e xestión privada por outro de financiamento e xestión públicas. É necesario denunciar o contrato e rescatar a concesión para o patrimonio público.
6. A pesar de que a Xunta declare que actúa como espectador, a realidade, segundo as súas propias declaracións é que avala e garante o financiamento ante o BEI e posiblemente o ICO, polo que de acordo cos criterios SEC e a lei de estabilidade Orzamentaria, debese computar como débeda nas contas públicas. De todos os xeitos serán os organismos comunitarios competentes e a Intervención Xeral do Estado a quen corresponde a cualificación.
7. A isto hai que engadir as reducións do proxecto orixinal que se están operando para adaptalo ás necesidades económicas da concesionaria que, de confirmarse, vulnerarían os pregos de condicións e o Proxecto Sectorial.