Plataforma en Defensa da Sanidade Pública

Os medios de comunicación recolleron recentemente noticias sobre presións e ameazas da dirección do Complexo Hospitalario de Vigo a responsables dos servizos para evitar que se sitúen contra a estratexia do SERGAS de construír o Novo Hospital recorrendo á Iniciativa de Financiamento Privado (PFI).
Este modelo de financiamento e construción fará que o Novo Hospital sexa PRIVADO; moito máis reducido de tamaño (perderá 68 mil metros cadrados respecto dos 172 mil inicialmente previstos); será construído con materiais de baixa calidade (como sucede nos outros hospitais construídos por PFI en Madrid, Valencia ou Baleares).

A finalidade de todo isto é aforrar gastos ás empresas concesionarias e garantir a POVISA o mantemento do Concerto Singular que lle proporciona un mercado sanitario cautivo de 140 mil habitantes en Vigo e nos concellos da área.
Esta estratexia de amedrentamento pretende manter o ocultismo actual sobre os plans do Novo Hospital (estase construíndo un hospital na clandestinidade).
Polo hospital circula, na fala da xente, a idea de que todo aquel Xefe de Servizo ou responsable de área que non acepte á redución do novo hospital, será removido sen contemplacións.
Con todo os Xefes e responsables de unidades teñen unha responsabilidade ante os seus propios servizos e ante a cidadanía de Vigo e da súa comarca, con cuxos impostos se financian os servizos. Esta responsabilidade deberíase materializar en procurar, por todos os medios legais ao seu alcance, que os seus servizos queden ben dimensionados, de acordo co proxecto inicial, para garantir a asistencia sanitaria de primeiro nivel durante, polo menos, os próximos cincuenta anos.
Somos conscientes de que grazas ás nosas denuncias sobre a redución da superficie do hospital, os Xefes de Servizo empézanse a dar conta do engano ao que foron sometidos durante estes tres anos de ausencia de información e da imposibilidade de modificar o proxecto. Con todo o Sergas busca a súa complicidade ou o seu silencio para validar un proxecto que frustra o traballo realizado por mais de 1.000 profesionais do CHUVI e as expectativas xeradas no proxecto definido no ano 2009 (cun consenso social, profesional e político de todo o centro) e fai perder definitivamente a posibilidade de reordenar as infraestruturas sanitarias de Vigo e de pór fin á intolerable discriminación sanitaria de Vigo e da súa comarca.