Plataforma en Defensa da Sanidade Pública

A Plataforma SOS Sanidade Pública integrada pola Confederación de Asociacións de Vecinos de Galicia, os sindicatos SATSE, CIG, UGT e CCOO, organizacións de usuarios, Asociación Galega para a Defensa da Sanidade Pública, ONGs, partidos políticos progresistas, concellos, etc, promoveu unha Iniciativa Lexislativa Popular (ILP) coa finalidade de deter a política de recortes e privatizacións da Sanidade Pública Galega impulsada polo o actual Goberno Galego, para garantir o dereito constitucional á saúde dos galegos.

A proposición de Lei opta expresamente pola xestión pública directa dos centros sanitarios, a potenciación da Atención Primaria e a promoción de saúde como alternativa á crise e as áreas sanitarias como espazo para a planificación e a xestión dos recursos.
Durante 4 meses as Plataformas Galegas que integran SOS Sanidade Pública, xunto con outros colectivos como ONGs e o 15M desenvolverán actividades de información, debate e mobilización social en todas as áreas sanitarias da CCAA.
Os puntos da ILP son:

1. A defensa do carácter público da sanidade como garantía do dereito á saúde de todos os galegos.
2. A xestión pública e directa dos servizos sanitarios e o rexeitamento ás formas de financiamento e xestión privada introducidas pola Xunta de Galicia.
3. A necesidade de incrementar a capacidade resolutiva da Atención Primaria mellorando os seus recursos e o acceso ás tecnoloxías diagnósticas, como base dun sistema sanitario accesible, equitativo e eficiente.
4. Mantemento do modelo descentralizado do sistema sanitario galego a través das áreas sanitarias, como espazos para a planificación, asignación e xestión integral dos recursos en base ás necesidades sanitarias da poboación e coa súa participación activa.