Plataforma en Defensa da Sanidade Pública

A Plataforma en Defensa da Sanidade Pública de Cangas rechaza as operacións especulativas que sobre a construción do Centro de Alta Resolución (CAR) do Morrazo se fixeron públicas nos últimos días.
Dito isto, temos as nosas dúbidas de que algúns interlocutores políticos que teñen tomado a palabra durante a campaña electoral para referirse ao CAR, estean a tomar as cousas coa debida seriedade, ao centrar o debate nunha finca de 3.000 m² cando desde hai dous anos existe un informe técnico favorable do SERGAS sobre uns terreos de 20.000 m² brutos para a súa ubicación. Tampouco estamos nada seguros de que aqueles que actúan como portavoces oficiosos da Consellería de Sanidade saiban exactamente do que están a falar cando se refiren as características dun centro deste tipo, polo que, desde Plataforma en Defensa da Sanidade Pública de Cangas vémonos obrigados a manifestar públicamente que queremos:

• Un CAR con alta dotación de recursos estruturais e diagnósticos: aspiramos a que sexa realmente de “alta resolución” e non un mero ambulatorio de consultas de especialistas como algunhas voces por ignorancia ou intencionadamente teñen insinuado. A importancia dun centro destas características radica precisamente na consulta única, que permitirá que, no mesmo acto asistencial, se faga o diagnóstico, as exploracións, o tratamento, a rehabilitación e no seu caso, a continuidade da asistencia necesaria sen derivación ao centro hospitalario de referencia.
• Un CAR completo: aspiramos a que conteña unha carteira de servizos que inclúa polo menos o 90% das especialidades, así como raios e laboratorio; e que nos turnos de tarde e noite funcione como un PAC ou servizo de urxencias de 24 horas para toda a poboación da comarca asignada. A incorporación da homodiálise contribuiría, ademáis, a evitar desprazamentos a Vigo dos/das pacientes co conseguinte aforro.
• Un CAR cen por cen público: rechazamos totalmente a posibilidade de que faga pola vía público-privada como está facendo a Consellería de Sanidade cos novos centros de saude e hospitais, o cal suporía entregarlle a unha gran empresa concesionaria a súa xestión, a explotación de determinados servizos e a introdución de tendas (“shopping”) dentro das instalacións. Para servizos sanitarios privados xa temos abondo con POVISA.
• Un CAR ben comunicado: invitamos a todos os axentes implicados a pensar que éste non é un servizo exclusivo para Cangas senón que está pensado para responder ás demandas e necesidades dos habitantes de varios concellos, polo que a súa localización e accesibilidade deberían tamén un factor importante á hora de optar por unha alternativa definitiva.

Finalmente, dado o carácter supramunicipal do CAR, queremos insistir en que neste proxecto non debe haber lugar para os localismos: o consenso necesario pasa por contar con todos os Concellos implicados. Neste sentido desde a Plataforma en Defensa da Sanidade Pública de Cangas esiximos da Xunta que saia da súa clamorosa pasividade e deixe de ampararse nas dificultades dos concellos para resolver problemas que en moitos aspectos os superan para non facer absolutamente nada. A fin de contas, é a administración autonómica a que ostenta as principais competencias á hora de ofertar uns servizos de saúde suficientes e de calidade a toda a cidadanía.


La Plataforma da Sanidade rechaza las "operacións especulativas" sobre el CAR
Publicado en Faro de Vigo