Plataforma en Defensa da Sanidade Pública

Á vista dos ridículos investimentos contemplados nos anunciados orzamentos autonómicos para 2.011 do SERGAS para Cangas, a Plataforma en Defensa da Sanidade Pública de Cangas quere manifestar o seguinte

* Que non é de recibo a dotación de 50.000 € destinada á construción do Centro de Saúde de O Hío por parte da Xunta, o cal, contrasta escandalosamente co enorme esforzo de gasto efectuado polo Concello, oito veces superior (400.000 €), para a merca dos terreos, tendo, ademáis, que superar as esixencias postas sorpresivamente a última hora por parte do SERGAS cando se lle ía facer entrega da parcela hai xa meses.

* Que o investimento de 0 € para a construción do Centro de Alta Resolución (CAR) non se corresponde, en absoluto, coa propaganda que ven facendo o SERGAS dos seus propios proxectos e plans para poñer a disposición dos usuarios e usuarias do Morrazo unha infraestrutura tan necesaria para a realización das probas diagnósticas, evitando os grandes desprazamentos aos centros hospitalarios de Vigo.

Por todo iso, desde a Plataforma en Defensa da Sanidade Pública de Cangas queremos lembrarlle á Xunta de Galicia que é o propio SERGAS o que ten as compentencias á hora de proporcionar os servizos de saúde e que non vale estar continuamente especulando en clave electoralista ou escudándose nas dificultades, xa sexan burocráticas ou urbanísticas, para non facer o que se debe, neste caso, colaborar estreita e lealmente con todas as administracións implicadas para que esas infraestruturas tan necesarias e urxentes para os veciños e veciñas de Cangas, tal como son o Centro de Saúde de O Hío e o Centro de Alta Resolución do Morrazo sexan unha realidade canto antes.