Plataforma en Defensa da Sanidade Pública

A Asociación Galega para a Defensa da Sanidade Pública ante o anuncio da Conselleira de licitar antes de fin de ano 19 centros de saúde recorrendo ao financiamento privado quere comunicar:

1. Que se intenta de maquillar a privatización dos Centros de Saúde recorrendo ao subterfugio de denominar esta fórmula como pago por dispoñibilidade.
2. Que a Conselleira mente cando afirma que esta fórmula non incrementará a débeda pública porque non aparecerá reflectida nos orzamentos no capítulo de investimentos, xa que se pagará con cargo ao de gasto corrente.
3. Isto, ademais dun insulto á intelixencia dos galegos, oculta o feito de que recorrer ao financiamento privado propiciará que o endebedamento sanitario de Galicia multiplíquese por seis (para facilitar as ganancias millonarias aos consorcios sanitarios afíns ao PP que se están apoderando dos servizos sanitarios das CCAA onde goberna).
4. O que os consorcios privados, ademais de redactar o proxecto e executar as obras dos Centros de Saúde, asuman a conservación das instalacións e a reposición dos equipamentos durante 20 anos, suporá un risco para os usuarios dos mesmos xa que está demostrado que para maximizar as súas ganancias as empresas adxudicatarias realizan aforros nestes capítulos (limpeza, seguridade, mantemento, xestión enerxética, xestión de residuos e labores de desinfección, desinsectación e desratización), pondo en risco a seguridade e a saúde dos usuarios dos centros sanitarios.
5. As adxudicatarias asumirán ademais a explotación comercial dos centros de saúde transformándoos nunha especie de galerías comerciais ou mercadillos, desvirtuando a súa función sanitaria.

Por todo iso desde a AGDSP consideramos escandaloso que se abandonou o Plan de Mellora de AP, elaborado consensuadamente por todas as organizacións do sector e que pretendía acabar coa falta de recursos, a burocracia e a baixa capacidade resolutiva, para acabar privatizando os centros de saúde transformándoos en mercadillos.