Plataforma en Defensa da Sanidade Pública

No próximo Pleno do Concello de Cangas, a celebrar o mércores, día 15, inclúese na orde do día unha moción na que se instará, de saír aprobada, á Consellería de Sanidade para que tome as medidas oportunas co obxectivo de conseguir que, canto menos, se vaia aminorando a enorme diferencia entre os tempos de espera medios das listas de espera cirúrxicas correspondentes ao hospital de referencia da nosa área sanitaria, POVISA, con relación ao resto dos hospitais dependentes do SERGAS.
Esta iniciativa xurde da petición da Plataforma en Defensa da Sanidade Pública de Cangas dirixida aos distintos grupos municipais para que o ente municipal tome en consideración este importante problema que padecemos especialmente os veciños e as veciñas de Cangas. Temos que dicir que a acollida entre os grupos municipais foi, en xeral, favorable, segundo puidemos constatar na ronda de entrevistas que mantivemos con todos eles durante as últimas semanas.
O motivo de fondo que suscita a presentación desta moción sobre as listas de espera, vén dado polos últimos datos oficiais dados a coñecer polo SERGAS, correspondentes ao segundo trimestre do presente ano, os cales, debuxan un cadro verdadeiramente preocupante, xa que o tempo de espera medio das listas de espera para a atención cirúrxica en POVISA de 121, 9 días contrastan escandalosamente, por poñer o exemplo máis próximo, co do Complexo Hospitalario de Vigo establecido nos 72,2 días.
Desde a Plataforma en Defensa da Sanidade Pública de Cangas denunciamos, ao mesmo tempo, a discriminación inadmisible que supón a obrigación para os veciños e veciñas de acudir a un centro privado, cuxos deficits en atención e prestación de servizos son clamorosos, como se fosemos cidadáns de segunda ou terceira categoría. Nese sentido, non descansaremos ata ver recoñecido o dereito dos pacientes do noso Concello a ser atendidos no hospital público correspondente.