Plataforma en Defensa da Sanidade Pública

A recente publicación das listas de espera cirúrxicas por parte do SERGAS correspondentes ao segundo trimestre do ano, volve poñer en cabeza a POVISA, o centro de referencia asignado aos usuarios cangueses, moi por riba do resto dos hospitais públicos de Galicia. Por facer unha comparación, mentres que o tempo de espera medio deste centro concertado sería de 121, 9 días o do Complexo Hospitalario de Vigo acadaría os 72,2 días de media, 28 o de Valdeorras e 43 o de Verín. Ademais, en relación ao trimestre anterior, correspondente período de xaneiro a marzo, o tempo de espera estrutural cirúrxica, segundo revelan os propios datos oficiais, tende a incrementarse. E todo isto, tendo en conta que nas citas sucesivas de especialidades, as cifras están desvirtuadas, por aprazar no tempo a súa concesión causando novas molestias, desprazamentos e gastos para obtelas, de tal maneira que os pacientes están esperando e non constan nas listas.
Desde a Plataforma en Defensa da Sanidade Pública de Cangas queremos denunciar a discriminación que supón a obrigación para os veciños e veciñas de acudir a un centro privado, cuxos deficits en atención e prestación de servizos son clamorosos como evidencian as frecuentes derivacións a outros hospitais por insuficiencia de medios en canto a espazos e persoal, e reclamamos o dereito dos pacientes do noso Concello a ser atendidos no hospital público correspondente.
Neste sentido, a Plataforma en Defensa da Sanidade Pública de Cangas quere anunciar que dará os pasos oportunos para conseguir que antes de nada a Consellería de Sanidade aclare definitivamente se coa construción do novo hospital de Vigo os usuarios de Cangas terán garantida a atención neste centro. Este é un obxectivo considerado esencial para deixar de ser tratados cidadáns de cuarta ou quinta categoría dentro da nosa área sanitaria como queda de manifesto coas listas de espera que agora denunciamos.