Plataforma en Defensa da Sanidade Pública

Despois de celebradas as eleccións autonómicas, desde a Plataforma en Defensa da Sanidade Pública de Cangas, queremos manifestar o seguinte:

1. Que existe unha maioría de cangueses e canguesas que o pasado 21 de outubro optaron nas urnas polas opcións que se pronunciaban en contra dos copagos, dos recortes e das privatizacións nos servizos públicos, sendo derrotado o partido que goberna nestes momentos en Madrid e Compostela, ao obter unha cantidade de votos considerablemente inferior en Cangas. A cidadanía tiña motivos abondo para expresarse desta maneira diante da pasividade e os incumprimentos de compromisos adquiridos polo Partido Popular como son a non construción do Centro de Alta Resolución do Morrazo, do centro de saúde de Aldán-O Hío e a redución do proxecto do Novo Hospital de Vigo que só beneficia a POVISA.
2. Que tal como indican estes resultados, sentímonos especialmente animados a continuar a loita contra as medidas, aínda máis duras, que están por vir co rescate que se anuncia e que ameaza con proseguir coa demolición dos servizos públicos en xeral e do sistema público de saúde en particular. Neste sentido, desde a Plataforma tentaremos impulsar en Cangas as alianzas necesarias co resto do movemento social e sindical para, nun proceso realmente aberto, participativo e sen exclusións, articular as iniciativas e convocatorias de resposta ás agresións que, coa excusa da crise, está a perpetrar o gran capital financieiro e transnacional a través dos gobernos títeres que non nos representan.
3. Que, sendo a Plataforma unha iniciativa cidadá, apoiamos a convocatoria de Folga Xeral para o próximo 14 de novembro feita polas centrais sindicais, xa que consideramos que para parar o saqueo ao que estamos sometidos é necesaria a mobilización de todos e todas os que día tras día ven disminuidos e recortados os seus dereitos sociais e laborais.

Este domingo publicaba "Atlántico Diario" unha comparativa en distintas áreas desde a chegada do goberno de Feijoo ao goberno da Xunta á situación actual. No que respecta á sanidade os datos son ben elocuententes. A única "mellora" que se pode apreciar no gráfico son as "Listas espera total pacientes", pero hai que ter en conta que os datos de 2012 son o resultado dunha exhaustiva manobra de maquillaxe a base de camuflar pacientes nas listas de espera non estruturais que non aparecen nas estadísticas públicas.
Publicado en Atlántico Diario (pdf)