Plataforma en Defensa da Sanidade Pública

Poucas horas antes de presentar a dimisión o pasado 15 de maio, o Valedor do Pobo D. Benigno López , asinou unha resolución pola que“Unha vez estudado o problema formulado, admitimos a trámite a queixa sobre as listas de espera no Hospital POVISA de Vigo, por considerar que atopa, en principio, cobertura constitucional ao abeiro do artigo 43 da Constitución Española e promóvese a investigación sumaria e informal de conformidade co establecido no artigo 22 da Lei6/1984, do 5 de xuño, do Valedor do Pobo ante a Consellería de Sanidade, competente para o esclarecemento dos feitos”. (Escrito contestación do Valedor do Pobo, de 14 de maio 2012, expediente 1.5.Q/861/12).
E curiosamente, rexeita a petición de investigar o libre acceso ao futuro hospital de Vigo para os usuarios do Morrazo por entender que non é o momento e hai que esperar a “cando estean acordados dun xeito definitivo os campos de actuación de dito hospital e existan acordos da administración sanitaria a tal fin, xa que neste momento, co tempo que falta para que empece a funcionar, considérase que non existen eses acordos definitivos que poidan ser valorados”.

Na Plataforma xa estamos afeitos a “comprensión” do Sr. López coas “dificultades da administración” para cumprir as súas obrigas, como xa aconteceu con semellante denuncia feita polas listas de espera no 2011 e que arquivou sen máis explicacións, polo que só nos queda confiar que o seu substituto, don José Julio Fernández, teña valor e dignidade para, ao amparo do artigo 43 da Constitución e o artigo 23 da Lei de Cohesión e calidade da Saúde (“todos os usuarios terán acceso ás prestacións sanitarias en condicións de igualdade efectiva”) inste a Fiscalía para que presente o recurso de inconstitucionalidade polo seu flagrante incumprimento Falamos de esperas medias de máis de 185 días para unha operación.
E respecto a o noso dereito a ir ao novo hospital de Vigo, amosa unha luz de intelixencia ao constatar, dende o seu privilexiado lugar e coincidir coa opinión da Plataforma, que do novo hospital non hai máis que fume, máis ben unha espesa cortina de fume negro e ningunha certeza.