Plataforma en Defensa da Sanidade Pública

A idea básicamente consiste en practicar recortes aparentemente indoloros ("catro cafés" por aquí) ou en poñer cataplasmas con efectos sedantes (darlle a gratuidade dos medicamentos aos desempregados sen prestación), pero a verdadeira trama de fondo é a que está esfiañando o sistema de saúde público, utilizando o argumento de "segundo a renda" para erosionar os principios básicos nos que se basea, quer dicir, a universalidade, a equidade, a solidariedade, etc.
Se non reaccionamos axiña e con contundencia, imos camiño de ter un sistema totalmente desmembrado, incoherente, salferido de excepcións e casuísticas que, polo xeral, situarán ao usuario ou usuaria da sanidade pública no bordo do precipicio, converténdonos a todos/as en posuidores duns "pseudodereitos" sempre provisionais e, por suposto, sempre susceptibles de empiorar e mesmo de se evaporar.
Cada vez que se produce unha reacción social colócanse as medidas antisociais máis fortemente contestadas nun limbo de tolerancia ou se articula unha regulamentación "ad hoc" para ir tapando o buraco, á espera da oportunidade adecuada para asentalas definitivamente. Isto comprobámolo sobre todo desde que Feijoo puxo en práctica o "tarxetazo" en finais de 2.011. Primeiro desactivou as tarxetas sanitarias a miles de inmigrantes e persoas desempregadas e logo das denuncias e da inquietude causada na opinión pública desbloqueounas de novo sen modificar para nada a lexislación habilitante de tal tropelía contra os dereitos sociais dos colectivos afectados.
Agora, despois da publicación do Real Decreto de medidas urxentes en materia de sanidade, a cousa vai quedando clara: desempregados sen cobertura fóra da comunidade autónoma, estudantes, becarios, o clero católico baixo e pobre (monxas), etc. sen dereito a cobertura non urxente, é dicir, toda a poboación maior de 26 anos sen cotización á SS.
A conclusión é que nos están a cambiar o cobertor co que pasabamos razonablemente ben o inverno por outro farrapo raído e cheo de remendos que ten os días contados.