Plataforma en Defensa da Sanidade Pública

Anotación da axenda de Joaquín Varela na que se recolle a reunión de Dorribo con Feijóo en San Caetano e con Farjas na Consellería de Sanidade.

Foron varias as especulacións feitas a raíz do cese de Pilar Farjas á fronte da Consellería de Sanidade. Agora xa temos un dato máis. A xuíz instrutora do caso "Campión", no que están enmallados políticos de todo o arco parlamentario, chama a declarar á ex-Conselleira para que aclare a que viñan as visitas que o presunto delincuente, Dorribo, lle facía a ela e máis ao propio Presidente da Xunta no seu despacho.
Segundo se puido saber a través do sumario, ao dimitido presidente do IGAPE (Instituto Galego de Promoción Económica), Joaquín Varela, tamén involucrado na trama, atopáronlle unha nota manuscrita que dicía: "Vou luns á Consellería que está moi interesada no aforro farmacéutico".
Despois destas revelacións non só entran as dúbidas sobre as reais intencións de Farjas cando fixo das políticas de gasto en farmacia un dos principais leitmotivs da súa xestión senon tamén sobre o verdadeiro motivo do seu desprazamento do círculo próximo a Feijoo.