Plataforma en Defensa da Sanidade Pública

Ante as informacións de que o Hospital POVISA de Vigo vai ampliarse en 14.000 metros cadrados para incrementar as súas camas (45 máis das actuais) e duplicar o número de quirófanos, cun custo de 15 millóns de euros, grazas á renovación do seu Concerto Singular co Servizo Galego de Saúde (Sergas), por outros 10 anos máis, a Plataforma para a Defensa da Sanidade Pública de Vigo quere comunicar á opinión pública e aos profesionais e traballadores sanitarios da área que:

1. A renovación do Concerto Singular vai ser novamente aproveitado por este centro privado para consolidar e ampliar a súa posición na área como provedor de servizos sanitarios con diñeiro público, facéndose aínda máis imprescindible a longo prazo.
2. A ampliación do centro con diñeiro público, supón que POVISA foi capaz, unha vez máis, de condicionar o desenvolvemento do complexo Hospitalario Universitario de Vigo, que xa reduciu o número de camas de 1.490 a 900, para que POVISA manteña as súas 400 camas na área (estas ían ser integradas polo Novo Hospital no proxecto orixinal abandonado pola actual Consellería de Sanidade).
3. É máis que probable que con esta ampliación, que duplica a capacidade cirúrxica de POVISA, o CHUVI pode ver ata minguado o seu proxecto na área cirúrxica.
4. A ampliación e consolidación do POVISA como provedor de servizos para o SERGAS, xunto coa privatización e redución do Novo Hospital suporá a privatización total da atención Hospitalaria en Vigo, o mantemento dun modelo hospitalario fragmentado, disfuncional e a perda da esperanza de que Vigo conte cun gran centro estratéxico que reequilibre a área Sur co Norte de Galicia.
5. Dende a Plataforma para a Defensa da Sanidade Pública de Vigo esiximos á Consellería de Sanidade, dirixida por unha ex-xerente deste grupo empresarial, que faga público o proxecto do Novo Hospital, para que os cidadáns, sanitarios, autoridades e axentes sociais de Vigo coñezan dunha vez a auténtica natureza do mesmo.