Plataforma en Defensa da Sanidade Pública

Hoxe, 15 de outubro, a partir das 18h. máis de mil persoas xuntáronse en Moaña para percorrer en manifestación as rúas baixo a proclama "Unid@s por un cambio global", facendo así fincapé no rexeitamento ás políticas neoliberais que promoven a privatización dos servizos públicos, entre eles a sanidade, e denunciando ao poder das élites financeiras que soerguéndose por riba da soberanía dos estados impoñen a súa axenda de axustes e recortes en contra dos intereses das grandes maiorías.
Xunto aos lemas feitos xa populares polo movemento 15m como "Pouco pan para moito chourizo", "Non nos representan", "Con este sistema imos de cu", etc., poidéronse escoitar voces que coreaban desde "Solución, banqueiros a prisión" ata "Banca de usura, políticos basura" pasando polo clásico "Botín c..., traballa de peón".
Respondía a manifestación ao chamamento de unha xornada de mobilización a nivel mundial feito desde a rede 15O e nela participaron persoas a título individual e colectivos do Morrazo entre os que se encontraban as plataformas da sanidade posicionadas en contra das medidas de recortes e de potenciación do sector privado emprendidas polo actual goberno da Xunta.