Plataforma en Defensa da Sanidade Pública

Desde que a páxina web do SERGAS surte información sobre as listas de espera cirúrxica dos distintos hospitais de Galicia, nunca o tempo de espera medio en POVISA (163,5 días) tiña acadado uns niveis tan altos, tal como se pode comprobar no gráfico de abaixo. Dando por válidos estes datos, o cal é moito supoñer dado o nivel de desinformación, terxiversación e mentiras ao que ten chegado a Consellería da Sra. Farjas, o diferencial coa media dos hospitais de Galicia tamén se incrementou dunha maneira moi notable durante o terceiro trimestre do ano.
Estes resultados reflicten o fracaso do modelo implementado pola Consellería de Sanidade que se une ao maltrato dispensado ao Morrazo deixándonos sen o comprometido Centro de Alta Resolución e fóra do Novo Hospital de Vigo. Segundo se pode desprender das últimas informacións que apuntan a unha redución drástica no número de camas e de servicios en xeral deste novo centro hospitalario, os veciños e veciñas do Morrazo seguiremos encadeados a POVISA e non teremos a posibilidade de acceder a el mediante a cacarexada "libre elección de hospital". Ante isto desde a Plataforma en Defensa da Sanidade Pública de Cangas únimonos as cada vez máis numerosas voces que piden a dimisión da Conselleira de Sanidade, a Sra. Farjas.