Plataforma en Defensa da Sanidade Pública

A Plataforma en Defensa da Sanidade Pública de Lugo denuncia que nos primeiros meses do ano, arredor duns 1.500 usuarios da sanidade pública galega (doentes que reciben un tratamento de osixenoterapia domiciliaria con concentrador, doentes pulmonares, EPOC) recibiron nos seus domicilios unha circular firmada polo Secretario Provincial do Sergas, o Sr. J. Ramón Fernández González (a súa vez Director Provincial do Sergas, en funcións), na que se lles comunicaba que a orden do 4 de novembro do 2010 (DOG do 16-11-2010), da Consellería de Sanidade da Xunta de Galícia, non contempla no seu articulado a compensación económica polo consumo de auga e electricidade que se aboaba ata a data ós citados doentes e que ascendía a 14,46 euros mensuais, (173,72 euros anuais), razón pola que se deixará de pagar a citada cantidade a partir do día seguinte a súa publicación.
Esta medida, demostra que en Galicia os plans de contención do gasto empezaron hai xa algún tempo dunha forma calada e sen apenas repercusión mediática. Quen se vai preocupar de 1500 doentes en Galícia, posiblemente alonxados entre si, sen posibilidade de protestar, enfermos crónicos, anciáns con pensións ridículas...?
Os medios téñenos ó tanto dos recortes que se queren poñer en marcha en Cataluña, pero  sospeitosamente dos que o PP está a impor en Galicia non falan, e levamos xa dous anos e medio sufrindo fortes recortes.