Plataforma en Defensa da Sanidade Pública

Hoxe volveráse a falar no Pleno do Concello de Cangas do Centro de Alta Resolución do Morrazo, unha infraestrutura sanitaria de suma importancia para unha comarca como a nosa moi poboada, alonxada do hospital de referencia e, sobre todo, que precisa e merece ser urxentemente reparada pola discriminación que xa dura décadas, ao estar os veciños e veciñas do Morrazo encadeados a POVISA, hospital privado que ostenta a dubidosa honra de posuir o récord, e a moita distancia, das listas de espera dos hospitais de Galicia.
Estamos a falar dun avanzado dispositivo para a atención da nosa saúde que suporía unha mellora sustancial da atención especializada, pois en virtude do que comunmente se denomina "unidade de acto" calquer paciente poderá ser explorado, diagnosticado e tratado no mesmo día sen necesidade, como ocurre agora, de desprazarse varias veces ao hospital de referencia. O CAR é para efectos divulgativos un "hospital sen camas", onde se realizarían, ademáis, operacións de cirurxía menor, con radiodiagnóstico, laboratorio, hemodiálese e PAC de 24 horas, cubrindo o 95% das especialidades como mínimo.
Dito isto, cabería engadir rápidamente a importancia de que o Centro estea situado nun lugar accesible para os usuarios e usuarias dos Concellos aos que pretende dar cobertura e, ademáis, ser construído pola iniciativa pública, xa as fórmulas da chamada "Colaboración Público Privada” son especialmente gravosas ao obrigar a administración pública a pagar canóns ás UTES construtoras durante 20 ou 30 anos.
Pero sen perder de vista o obxectivo fundamental de pretender unha mellora sustancial da calidade asistencial, hai que poñer o acento en que a aposta polo CAR debería constituir un obxectivo estratéxico de primeira orde para a nosa comarca; un proxecto no que todas as forzas institucionais e sociais deberíamos embarcarnos e poñernos a remar no mesmo rumbo. A ninguén se lle escapa o que podería supoñer nestes momentos de crise, tanto para a reactivación económica das empresas da comarca como para paliar o desemprego, o efecto anticíclico dun investimento duns 10 millóns de euros para a súa construción. Ademáis, o CAR, unha vez en funcionamento, constituiríase nun importante eixo vertebrador do territorio, podendo inducir, por exemplo, a posta en marcha de liñas regulares de transporte público debido ao importante fluxo de persoas que xeraría.
A estas alturas só falta que as institucións locais e as autoridades que están á súa fronte se involucren decididamente neste proxecto que leva empantanado desde que no ano 2008 o SERGAS e o Concello de Cangas elaboraran un primeiro informe técnico para situar o CAR no barrio da Rúa.
Desde a Plataforma somos moi conscientes das dificultades económicas que están a pasar as institucións locais, por iso propoñemos que esta obra se impulse como un proxecto de incidencia supramunicipal no que a Xunta tome a iniciativa, dado que o seu ámbito de influencia debe abranger polo menos aos concellos de Cangas, Moaña e Bueu. Pero esta unión de esforzos tense que producir xa. Non vaia ser que cheguemos a 2.013 e nos atopemos, de novo, sen partida orzamentaria por parte da Xunta, como lamentablemente sucedeu nos dous últimos exercicios.